હું એટલે..

હું એટલે, મારામાં વિચારોનું મોટું જોળું,

કાયમ સાથે ફરતું મારી અંદર એક ટોળું,

મન કહે તું માન મારું, મગજ કહે હું સાચું,

એ હુંસાતુંસીમાં ભીંસાતું પારેવું મુજ ભોળું,

જીભ માંગે રોજ નીતનવુ, તીખું ને રસીલું,

પેટ કહે, બનાવજે તું મારા માટે તો મોળું,

આંખો મારી આંસુ સારે, હોઠે સ્મિત પહેર્યું,

આ બધામાં હું કેમ કરીને જાત મારી ખોળું ?

એક આંગળી ચીંધું ,ત્રણ થાય મારી બાજુ

કેવી રીતે નક્કી કરુંહું ? શું કાળું- શું ધોળું ?

કેટકેટલા વિરોધાભાસને ભેગા રાખી જીવું,

એ વિચારને વિચારતાં, હું આંખો મારી ચોળું.