હજુ નડે છે

ઉત્તરાયણ પતી ગઈ, પણ દોરી હજુ નડે છે,

ફાટેલાં પતંગ પર, ચહેરાયેલું નામ, હજુ નડે છે !

ઢળતી સાંજ અને, આથમતાં સૂરજની લાલિમા,

વિતેલાં વરસોની, અમુલ્ય યાદ થઈ, હજુ નડે છે !

માસૂમ એ બાળપણ અને, નિર્દોષ એવું હાસ્ય,

કાગળની હોડી અને વરસાદ, થઈ હજુ નડે છે !

ખાટાં મીઠાં અનુભવો, અને સ્નેહનો સંગાથ,

જુદા જુદા ચહેરાંઓની, વિવિધ જાત થઈ, હજુ નડે છે !

ફૂલોની નજાકત અને, શબનમી એ પાંદડીઓ,

સુગંધ તારી, દિલ પર જખમ થઈ, હજુ નડે છે !

કદી 'ચાહત' તો કદી નફરતથી, જીવાય છે જિંદગી,

વિવિધતા સભર સ્વભાવ, માણસ થઈ, હજુ નડે છે !