ગરબે રમવા ચાલ

થનગનતાં એ પગલાં, 

તારી ઝાંઝરનો ઝણકાર,

હાથો પરની મહેંદી, 

તારા હૈયાનો ધબકાર,

હોય હવે શું બાકી, સહિયર ?

મન મુકીને મ્હાલ, 

તું ગરબે રમવા ચાલ.

આંખો પરનું કાજળ, 

નાની બિંદીનો શણગાર,

નાકે નથણી સોહે,

કાને ઝૂમખાંનો ચમકાર,

હોય હવે શું બાકી, સહિયર ?

મન મુકીને મ્હાલ, 

તું ગરબે રમવા ચાલ.

થનગનતું એ મનડું તારું,

સાથે ઢોલનો ધબકાર,

માથે મેલી મટુકડી,

ને ગરબાનો ટહુકાર,

હોય હવે શું બાકી, સહિયર ?

મન મુકીને મ્હાલ, 

તું ગરબે રમવા ચાલ.

રૂમઝૂમ કરતી રાતલડી,

મા અંબાને દરબાર,

ગરબા તાલે ઝૂમી ઉઠતાં,

સહુએ નાર ને નાર,

હોય હવે શું બાકી, સહિયર ?

મન મુકીને મ્હાલ, 

તું ગરબે રમવા ચાલ.