એક લાશ ઊભી
એક લાશ ઊભી
સતત દોડતી ભાગતી આ જિંદગીમાં,
યંત્ર બની જીવતી એક લાશ ઊભી !
જીવતાં ફૂગેલી કીડા ખરી પડે તેવી,
એને ક્યાં કોઈ લાગણીઓ જડી,
વિયોગની વેદનાની સાથે મૈત્રી ઘણી,
ચાદરની કરચલીઓની જેમ જોડે પડી,
નફ્ફટ બનીને ફરતી એક લાશ ઊભી !
ખીલીઓ ઠોકી ઠોકીને કાણાં પાડીને,
દીવાલોની જેમ દુનિયા આરપાર ખડી,
ક્યારેક ભૂતકાળની ધટનાઓ એમાં મળી,
સ્વજનની બાદબાકીઓની રફ્તાર લડી,
ભૂલી પડેલી ખોખલી એક લાશ ઊભી !
હદપાર થઈ ગયેલા વિયોગને યાદ કરી,
સમણાઓ સ્મશાનવત બનીને શાંત પડી,
નિસ્તેજ સ્મિતનાં ખંજન પર તલવાર નડી,
પાથરીને આશની મહેફિલમાં બદનામી જડી,
ખૂંપી ગયેલી બોજીલ એક લાશ ઊભી !