છલકતી વેદના
છલકતી વેદના
આ આંખોમાં હજુએ ક્યારેક મૌન ફરી વળે છે;
ત્યારે છલકતી વેદનાઓને વળી કોણ સાંભળે છે!
એમ ખૂણામાં વાળીને રાખી મૂકી હતી યાદોને;
ક્યારેક એમાંય જીવ જેવું કશુંક સળવળે છે!
સાંજનો સૂરજ એમ છટકી જાય છે ક્ષિતિજેથી;
જાણે વર્ષો પછી એને પ્રિયતમનો પાલવ મળે છે!
અહીં કોણ જીતી શક્યું છે શ્વાસોના નિરંતર યુધ્ધને;
કોઈએક પળે, બસ આમાંનો એક શ્વાસ જ તો છળે છે!
આમ તો છલકાઈ જાય આખો સમંદર એટલી લાગણીઓ,
તોય છેવટે એ બુંદ-બુંદ થઈને જ ઢળે છે!
મોકલેલી હર ટપાલો આજેય એટલે સુરક્ષિત છે;
કે પરબીડિયું ખોલવાનોય એને ક્યાં સમય મળે છે!
છે મદહોશી નિરંતર, ને જાણું છું કે જીવું છું;
બસ બે શ્વાસોની વચ્ચે જ તો હર જિંદગી ફળે છે!