ચાલ ને આપણે ભીતર જઈએ
ચાલ ને આપણે ભીતર જઈએ
બહાર બહુ મારી લટાર,
ચાલ ને ! ભીતર જઈએ,
બાગ બગીચા બહુ જોયા
ચાલ ને ! ભીતર એક પ્રેરણાનો બાગ રચિયે,
ખળ ખળ વહેતી નદીને ઝરણાં જોયા
ચાલ ભીતરે આ રણકાર સાંભળીયે,
હૃદયના બગીચામાં ઊગ્યું આ અહંકાર ને
નફરતનું ઘાસ
ચાલ ! પ્રેમના દાતરડાથી એને કાપીએ,
ફરી આ બાગ ને લીલોછમ બનાવીએ,
ચાલ ને ! ભીતર જઈએ ખુદ ને મળીયે,
નફરત વેરઝેરના સૂકા પર્ણો ને બાળીએ,
ચાલ ને ! ભીતર ના ખેતર ને આજે સાફ કરી કરીએ,
વિચારોની કોદાળીથી આ મનનું ખેતર ખેડી લઈએ,
પ્રેમનાં બીજ એમાં રોપી લઈએ,
ચાલ ને ! આપણે ભીતર જઈએ,
ચાલ ને ! મરજીવા બની ભીતરનો દરિયો ડહોળીએ,,
ભીતર પડેલા વિચારોના મોતીને આમ ગઝલમાં પરોવીયે,
ચાલ ને આપણે ભીતર જઈએ,
ભીતર સૂતા શમણાંઓ સોનેરી,
ચાલ ને ! એને જગાડીયે,
ચાલ ને ! આપણે ભીતર જઈએ,
સપનાઓને સાકાર કરીએ,
ચાલ ને ! આપણે ભીતર સૂતેલા આતમને જગાડીએ,
ઈબાદતની પાંખો થકી આ જન્નતની સેર કરીએ,
ચાલ ! પરમાત્મા ને મળીએ,
ચાલ ને ! આપણે ભીતર જઈએ,
ખોવાયેલા ખુદને શોધીએ.