બાની પુણ્યતિથિ

આજે બાની પુણ્યતિથિ છે.

બાપુજીની તિથિએ ચોકલેટ વહેંચી,

આઈસ્ક્રીમની પાર્ટી કરી હતી ,

બાની તિથિએ શું વહેંચવું ?

નવી સાડી બાએે માંગી નહિ ક્યારેય,

ખાવાના મોજશોખ ન રાખ્યા  ક્યારેય,

બાની તિથિએ શું  કરવું ?

રસોઈ કરી ભાવથી, કપડાં ધોયાં,

અમને સાચવ્યાં, ભણાવ્યાં,

બાની તિથિએ શું કરવું ?

મેણાં -ટોણાં સહ્યાં,  ને દુઃખ સહ્યાં,

મનની મનમાં રાખીને આશીર્વાદ વહેંચ્યા,

બાની તિથિએ હવે સાંભર્યું, શું કરવું ?

આશીર્વાદ, વ્હાલ  ને સહનશીલતા,

વહેલાં ઉઠીને લેવું પ્રભુનું નામ,

જતું કરવાની  ને હસી કાઢવાની ક્ષમતા,

જે બાએ શીખવ્યું તે હવે હું સૌને શીખવું  !

એ જ સાચી ઉજવણી, બાની  પુણ્યતિથિની ..