અવાજ આતમનો

મસ્તિષ્ક અને હૃદયનું આ દ્વંદ્વ કાયમ રહેવાનું જ,

તર્ક અને લાગણીઓનું મંથન કાયમ સહેવાનું જ.

કોઈ તો ધ્યેય છે, મનુષ્ય જન્મ લેવું અમસ્તું નથી,

વિચારોની રણભૂમિને વિચારોનું વૃંદાવન કરવાનું જ.

સત્ય-અસત્ય તો સાથે જ ડહોળાવાનાં મથનીમાં,

ધૈર્ય ધરી વિચાર વલોણે શુભત્વનું અર્ક તારવવાનું જ.

જો વિજય શિખર પર પહોંચવાની ખેવના પ્રબળ હો,

પછાડવા મથે કઠણાઈ, મ્હાત આપી ઉપર ચડવાનું જ.

દેખાડે સારું નરસું બન્ને, આ નિયમ ગુણપ્રધાન પ્રકૃતિનો,

'દીપાવલી' જીતી જ જઈશ, અંત:કરણનું સાંભળવાનું જ.