અહંભાવ કોઈ છોડતું નથી !

આતુર હું પણ છું, આતુર એ પણ છે,

છતાય વ્યક્ત બેઉમાંથી કોઈ કરતું નથી,

કારણકે... અહંભાવ કોઈ છોડતું નથી.

મળવું મારે પણ છે, મળવું એને પણ છે,

પણ પહેલ બેઉમાંથી કોઈ કરતું નથી,

કારણકે... અહંભાવ કોઈ છોડતું નથી.

વ્યસ્ત હું પણ નથી, વ્યસ્ત એ પણ નથી,

છતાય સમય બેઉમાંથી કોઈ કાઢતું નથી, 

કારણકે... અહંભાવ કોઈ છોડતું નથી.

નારાજ હું પણ નથી, નારાજ એ પણ નથી,

છતાય અબોલા બેઉમાંથી કોઈ તોડતું નથી,

કારણકે... અહંભાવ કોઈ છોડતું નથી.

દિલ મારેય તોડવું નથી, એનેય તોડવું નથી,

છતાય દિલને બેઉમાંથી કોઈ જોડતું નથી,

કારણકે... અહંભાવ કોઈ છોડતું નથી.

દિલગીર હું પણ છું, દિલગીર એ પણ છે,

છતાય દિલગીરી વ્યક્ત કોઈ કરતું નથી,

કારણકે... અહંભાવ કોઈ છોડતું નથી.

ઝઘડો મારે પણ પતાવવો છે ,એને પણ પતાવવો છે,

છતાય પહેલ કરીને ઝઘડો કોઈ પતાવતું નથી,

કારણકે.... અહંભાવ કોઈ છોડતું નથી.

નાદાન હું પણ નથી, નાદાન એ પણ નથી,

છતાય સમજદારી કોઈ બતાવતું નથી ?

કારણકે... અહંભાવ કોઈ છોડતું નથી.