આવડી જાય છે

જન્મતાંની સાથે, શ્વાસ લેતાં આવડી જાય છે,

’ને આમ જાતે, જીવતાં આવડી જાય છે !

પડતાં ‘ને આખડતાં, ચાલવાની કોશિશમાં,

જાતે, ડગલું ભરતાં આવડી જાય છે !

પ્રેમાળ મા ની મમતા, ‘ને બાપની શિસ્ત સાથે,

બાળપણને કેળવાતાં આવડી જાય છે !

ભીતરનાં ઘેરાં નાદને, ઓગાળી શકીએ તો,

મૌનને શાંતિથી સાંભળતાં આવડી જાય છે !

આડી તેડી ‘ને વાંકીચૂકી, ડગર પર ચાલતા 

મંઝિલ આપણી શોધતાં આવડી જાય છે !

અવનવાં ચહેરાંઓની, અડાબીડ ભીડમાં,

ચહેરો ખરો ઓળખતાં આવડી જાય છે !

ઈચ્છાઓ, આશાઓ ‘ને અરમાનોની સાથે,

જિંદગી 'ચાહત' થી જીવતાં આવડી જાય છે !