આપણે મોટા થઈ ગયા

નાના હતા ત્યારે મનના જ રહેતા,

હવે આપણે કેમ ખોટા થઈ ગયા ?

ખરેખર ! આપણે મોટા થઈ ગયા.

ધનનો નફો મેળવવાના ચક્કરમાં,

કેટલાક સંબંધોના તોટા થઈ ગયા,

ખરેખર ! આપણે મોટા થઈ ગયા.

ક્ષણભર માટે માંડ ખુશ થઈએ છીએ,

જાણે પાણીના પરપોટા થઈ ગયા,

ખરેખર ! આપણે મોટા થઈ ગયા.

સ્થિર થઈ જઈએ છીએ અમુક બાબતે,

જાણે ફ્રેમમાં જડાયેલા ફોટા થઈ ગયા,

ખરેખર ! આપણે મોટા થઈ ગયા.

ઘસાઈ જઈએ છીએ ખુદને ચમકાવવા,

જાણે આપણે પત્થર કોટા થઈ ગયા,

ખરેખર ! આપણે મોટા થઈ ગયા.

અહીંથી ત્યાં દોડ્યાજ કરીએ છીએ,

જાણે તળિયા વિનાના લોટા થઈ ગયા,

ખરેખર ! આપણે મોટા થઈ ગયા.

ક્યારેક ક્યારેક તો એવું લાગે છે,

કે જાણે મોટા થઈને ખોટા થઈ ગયા,

ખરેખર ! આપણે મોટા થઈ ગયા.