వ్రాయాలా ప్రేమ లేఖ

మనసుసరిగ తెలియలేక..ఇవ్వాలా ప్రేమలేఖ..! 

చూపులతో కాకుండా..వ్రాయాలా ప్రేమలేఖ..! 

నేనేమో తనకోసం..పడిగాపులు ఈ తోటన.. 

ఈలవేయు గాలిలోన..నింపాలా ప్రేమలేఖ..! 

తలపులలో ప్రవహించే..వలపునదిని చూపుటెలా.. 

మెఱుపువీణ శృతిచేసుకు..పాడాలా ప్రేమలేఖ..! 

విరహమెంత అద్భుతమో..గున్నమావి చివురులా.. 

కోకిలప్రియ రాగంలా..పొంగాలా ప్రేమలేఖ..! 

ఆవేదన తోడుచుక్క..కనుపాపల పాలలోన.. 

గోర్వెచ్చని హాసంలో..చిందాలా ప్రేమలేఖ..!