వలపు గంధం

ఎదను అల్లరిపెట్టి మురిపించే భావాలని

హృదయ కుంచెతో ముచ్చటగా చిత్రించి

వలపు గ్రంధాన్ని అలవోకగా లిఖించనా!

కలల కాపురం కనురెప్పలపై నివాసమని

అంబరాన్నున్న మెరుపుతారని చూపించి

ఎదిగిన ప్రేమ శిఖరం పై జెండా పాతిరానా!

ఆపాలనుకున్నా ఆగని మది సవ్వడులని

గీతంగా వ్రాసి రాగాన్ని జతచేసి ఆలపించి

ప్రేమలోని రెండక్షరాలు మనమని చెప్పనా!

ఇరు ఊపిర్లకు సులువైన మార్గం కలయికని

కలిసి కన్నీరిడి ఎదపై తలవాల్చి నిదురించి

వలపు సరిహద్దులే దాటామని నిర్ధారించనా!