విరహంతో

ఎర్రకలువ కొలనేమో..వేగుతోంది విరహంతో..!

కలువబాల మనసేమో..కందుతోంది విరహంతో..!

తన జాబిలి వస్తాడని..కోటికనుల ఎదురుచూపు..

కానరాని వలపేమో..మరుగుతోంది విరహంతో..!

ప్రేమగాయ మెవరితరము..సరిగ తెలిసి మాన్పేందుకు..

చెలియపూల సొగసేమో..అలుగుతోంది విరహంతో..!

కలువమొగ్గ లెన్నొ కూడి..పానుపైన లాభమేమి..

తన తనువున తాపమేమొ..రగులుతోంది విరహంతో..!

వెన్నెలింట వేడుకగా..తొలిరేయికి సన్నాహం..

ఎందుకనో ఏ మాయెనొ..మిగులుతోంది విరహంతో..!