వింతగా

కొంటె చూపుకు లేని కోపం..నీకు ఎందుకు వింతగా..!?

రెండు జడలకు లేని విరహం..నీకు ఎందుకు వింతగా..!?

మండుటెండను మంచు దుప్పటి మల్లె మార్చెద ఓ చెలీ..!

మల్లె తీగకు లేని తాపం..నీకు ఎందుకు వింతగా..!?

సమయవీణా మధుర సుధలను విందు చేసెద ప్రియ సఖీ..!

రేయి-పగలుకు లేని కలహం..నీకు ఎందుకు వింతగా..!?

స'రస జగతిని మునకలేయగ సంశయాలిక వీడవా..!?

నీలిమబ్బుకు లేని దాహం..నీకు ఎందుకు వింతగా..!?

ఇంద్ర ధనువుల ప్రణయ జగతిగ మనసు నిలిపితి చూడవా..!?

తీపి వలపుకు లేని అద్దం..నీకు ఎందుకు వింతగా..!?