తాత్కాలిక ప్రయాణం

ఓ బ్రతుకుజీవుడా...

పుడుతూ ఏడుస్తావు, చనిపోతూ ఏడిపిస్తావు !

చిరునవ్వు చిందిస్తావు, బాధలను భరిస్తావు !!

కష్టాన్ని నమ్ముకుంటావు, ఇష్టాన్ని అమ్ముకుంటావు !

విధి ఆడే నాటకంలో వీధిపాలవుతావు !!

ప్రేమే పవిత్రమంటావు, అందాన్ని ఆకర్షిస్తావు !

గుణమే గొప్పదంటావు, ఐశ్వర్యాన్ని ఆర్జిస్తావు !!

పద్ధతులను పాటిస్తానంటావు, ప్రకృతిని పాడుచేస్తావు !

పరులకు ప్రాధాన్యమిస్తానంటావు, పట్టెడన్నం పెట్టనంటావు !!

అజ్ఞానమనే అంధకారమే నీ ఆయుధమంటావా ?

అహంకారమనే ఆభరణమే నీ అలంకారమంటావా ??

మట్టిలో చేరే తనువుపై మమకారమెందుకోయి ?

గాలిలో కలిసే ఆత్మ పై అభిమానమేలనోయి ??

కుక్కకాటు నుండి కరోనా కాటు వరకూ...

శరణయ్యాని వేడుకున్నా మరణశయ్య తద్యమే కదా!

కనురెప్పవిప్పి కట్టెకాలేలోపే జీవితమంటే,

నడిమధ్య ఈ నాటకమేల నరుడా! ఓ మానవుడా!!