స్నేహానికి చిరునామా

పరువుకన్న బరువులేదు..వదిలిచూడు తెలుస్తుంది..!

 నీతో నీకే గొడవా..నవ్విచూడు తెలుస్తుంది..!

కాలి బూడిదైనా సరె..కాలనిది అహంకారం.. 

సత్యమిదే ఓ నేస్తం..ఆగిచూడు తెలుస్తుంది..!

చిత్తశుద్ధి బహుమతిగా..ఎవరికెవరు ఇస్తారోయ్..

ఆలోచనమాటు సరిగ..చేరిచూడు తెలుస్తుంది..!

విశ్వంలో కణకణమూ..దివ్యజ్ఞాన మందిరమే..

అంతరంగ సంద్రమునే..తఱచిచూడు తెలుస్తుంది..!

ప్రేమకావ్య రచనచేయు..అవసరమే లేదుకదా..

ప్రేమమయం జగమంతా..చదివిచూడు తెలుస్తుంది..!

స్నేహానికి చిరునామా..గుండెచాటునే ఉన్నది..

భావనయే మధురముగా..నిలిపిచూడు తెలుస్తుంది..!