సిగ్గొదిలిన చూపులు

కనులముందు కనబడితే చూపులెన్ని పుడతాయో

సిగ్గొదిలిన చూపులలో పరుగులెన్ని పుడతాయో

తడియారని కురులలోన మబ్బులెన్ని పుడతాయో  

రవి తాకిన బిందువులకు మెరపులెన్ని పుడతాయో

అద్దానికి అందాలను పొరబాటున చూపించకు

కదలలేని వస్తువులో తపములెన్ని పుడతాయో

పూవులంటి పదములతో బాటలోన నడిచి చూడు 

అడుగుల్లో సుగంధాల మడుగులెన్ని పుడతాయో

నిను చూడని వేళలోన వొక్కసారి నన్ను చూడు

ప్రేమించని మనసులోన వలపులెన్ని పుడతాయో

వేసుకున్న మేలిముసుగు తొలగిస్తే 

చూసిన చీకటి తనువున కాంతులెన్ని పుడతాయి