శూన్య ఘోష
శూన్య ఘోష
ఆరోజు అర్ధరాత్రి
ప్రపంచం అంతా
కలలు కూడా లేని
ప్రగాఢ సుషుప్తి లో
ఓలలాడుతూంటే
నేను మాత్రం
ఒంటరిగా నా గదిలో
నీ ఊహలతో
విలవిలలాడుతూన్న వేళ
నువ్వు నా పక్కనే ఉన్నట్టుగా
నీ ఉనికిని గుర్తించాను
పక్కకు తిరిగి చూస్తే
అంతా శూన్యం
ఈరోజు అర్ధరాత్రి
నీ ఆలోచనలు
చెదరగొట్టాలని
నేను చేసే ప్రయత్నాలన్నీ
నా గదిలో నీ ఉనికి
గుర్తించడంతో
భగ్నమయ్యాయి
తిరిగి చూస్తే
అంతా శూన్యం
నువ్వు నిజంగా
నన్ను వదలలేక
ఆత్మవై నా చుట్టూ
తిరుగుతున్నావా
లేక నీ ప్రేమను
మరచిపోలేక
నేనే భ్రమల్లో
విహరిస్తూన్నానా?