పయనం ఎటు

ఖబర్ తవ్వినవాడు వేరే మతస్థుడు అయితే ఖననం చేయవా భాయి ?

కాష్టానికి కట్టెలు అందించేవాడు వేరే కులస్తుడు అయితే దహనం చేయవా సోదరా ?

కంటనీటితో పేదవాడు అంటుకుపోయిన బిడ్డల కడుపులు చూస్తుంటే

కడుపు నిండిన కామందు కుల మత ఘర్షణలకు ఆజ్యం పోస్తుంటే

ఇంకెక్కడి మానవ లోకమిది ఇంకెక్కడి సభ్య ప్రపంచం ఇది ?

ఇంకెక్కడి మేధకు ప్రయోజనం ఇంకెక్కడి ఈ జనుల గొప్పదనం ?

చూపుకు చేరని స్వర్గం చుక్కల్లో ఎక్కడో ఉన్నదనిక్కడ

చురకత్తులతో రుధిరం కారిస్తే దారి నీకెన్నడూ దొరకదు మిత్రమా

శోకపు పునాదుల మీద నీవు కట్టాలనుకున్న భవంతి శుష్క యత్నమే

ఈ లోకంలో శాశ్వత మైనది ఏదీ లేదు నాలుగు రోజుల మజిలీనే అందరిదీ

నీవొకరికి కలిగించే దుఃఖం తిరిగి నీ ఇంటికే చేరుతుంది నిప్పు రవ్వగా

నీ పేరున ఒక మొక్క నాటు ఏదో ఒకనాడు నీడగా నిలుస్తుంది కొందరికి.