పతివ్రతనే

అడుగడుగునా ఆశలే అణగారిపోయి

అంచెలంచెలుగా ఆశయాలే కూలిపోతే

అడ్డుకున్న వారినే అక్కున చేర్చుకుని

ఆహా! ఓహో అన్న నేనూ...పతివ్రతనే!

అడ్డమైన ప్రశ్నలకీ కాదంటూ అవునని

అర్థమైనా కానట్లు అమాయకంగా నవ్వి

అడ్డంగా నిలువుగా తలూపి తైతెక్కలాడి

అబ్బో అమ్మో అంటున్న నేనూ...పతివ్రతనే!

అలై ఎగసిపడుతున్న కోర్కెలకి ఆనకట్టేసి

అనురాగాన్ని కలలోనే కామించి రమించి

అలుసైపోయి అరచేతిలో వైకుంటమే చూసి

అమాయకంగా అవునన్న నేనూ...పతివ్రతనే!

అవసరాల్ని ఆసరాచేసి అందాలని పొగిడి

అదును చూసేసి అదుపు తప్పినవారిని

అతిమంచివారంటూ అందరినీ ప్రేమించిన

అసలుసిసలైన అబలనైన నేనూ...పతివ్రతనే!