ఒకలేఖగ

చెలియకెంత తపనోమరి..ఒకలేఖగ..కావాలని..!

మల్లెకెంత మనసోమరి..తనసిగలో..విరియాలని..!

నీలికురుల మంతనాలు..నుదుటికెంత ఇంపోమరి.. 

గాలికెంత జోరోమరి..తన కబురులు చెప్పాలని..! 

ఏ వెన్నెల పరిమళమో..తన పాటగ మారిందా.. 

రేరాణిగ అలరిస్తూ..తన వీనుల మ్రోగాలని..! 

తన చూపే నవశిరీష..హంసతూలికా తల్పమ.. 

సరసవీణ రాగడోల..గీతమేదొ పంచాలని..! 

కొమ్మమీది పాలపిట్ట..ఎదురుచూపు భావమేమొ.. 

కొసరికొసరి చెలి పాపిట..సింధూరము దిద్దాలని..!