నీకు నాకు మధ్య..

ఎన్నో కలల్ని

ఎన్నో ఆశల్ని

మదిలో పోగేసుకున్న

మనం

అవన్నీ నిజమయ్యే

తరుణాన

ఈర్ష్యతో ఈసడింపుతో

కాలం కత్తి కట్టిన క్షణాన

మన మధ్య మాటలు

మౌనాన్ని ఆశ్రయించాయి

అపార్థాల నదిలో

మునకలేస్తున్నప్పుడు

అంతా శూన్యమై

నిరాశ నిస్పృహలతో

నీరసించిన మదికి

నీ మౌనం

తుఫానురాక మునుపు

నిశ్శబ్ధాన్ని తలపిస్తుంది

బంధాన్ని సమాధి చేస్తుంది

వున్నట్టుండి ఓ మధుర క్షణాన

నువు విసిరిన చిరునవ్వు బాణం

మన మధ్య అడ్డుగా వున్న

అపార్థాల తెరను తొలగించె

ఆగిన శ్వాసకు ఊపిరి పోసె

దూరాలను చెరిపేసెను

ఇన్నాళ్ళు మౌనం తరువాత

నీ నవ్వు కోటి రాగాలను రవళించె