నీ ప్రేమ

నీ ప్రేమను తెలియలేని..బ్రతుకెందుకు అంటాను..! 

నిన్ను గూర్చి పాడలేని..గళమెందుకు అంటాను..! 

ఈ కన్నుల మెఱుపులలో..నీ చెలిమి దీపాలే..

మనసునిలిపి నిను చూడని..కనులెందుకు అంటాను..! 

నా తలపుల గోరింటలు..పూయించే జాణవే..

పూజాసుమమై రాలని..వలపెందుకు అంటాను..!

నా భావనా గగనపు..ప్రణయాక్షర దీపికా..

మౌననిధికి మదిచేర్చని..ఊసెందుకు అంటాను..!

సమన్వయపు మధువునే..ప్రసాదించు కోమలీ..

ఆలోచన వీడలేని..పరుగెందుకు అంటాను..!