నేస్తమా

ఉదయించే రాగాలకు ఊపిరెవరు నేస్తమా 

మనసులోని భావాలకు ఊతమెవరు నేస్తమా 

ఊహలలో విహరించని హృదయమసలు ఉంటుందా

అంతరంగ పయనానికి సాక్ష్యమెవరు నేస్తమా 

అనుభూతుల కావ్యానికి మూలమేమిటో మరి

మనసులోని మౌనానికి తోడెవ్వరు నేస్తమా 

చూపుతాకు దృశ్యాలు నిట్టూర్పుకు గాయాలు

జ్ఞాపకాల యాత్రలోన సాయమెవరు నేస్తమా 

అందమైన ఆశయాలు అలవికాని దుఃఖాలు

స్వార్ధమైన లోకంలో బాసటెవరు నేస్తమా 

హసితాలే అలిగాయా ఆనందం వెలివేస్తూ

సంతోషపు స్వర్గానికి జోడెవ్వరు నేస్తమా