నేనెందుకు

ముల్లేమో అంటున్నది..మాటలలో నేనెందుకు..!?

పువ్వేమో అంటున్నది..పూజలలో నేనెందుకు..!?

లేని మనసు చేయు మాయ..కల్లోలం సంసారం..

కొలనేమో అంటున్నది..గొడవలలో నేనెందుకు..!?

పీడించే కర్మలన్ని..పట్టుకున్న కలలేగా..

మబ్బేమో అంటున్నది..ఊహలలో నేనెందుకు..!?

నిన్నునీవు చెక్కుకోగ..పనేముంది ఓ ఉలితో..

తానేమో అంటున్నది..కవితలలో నేనెందుకు..!?

ఈ కత్తులు తుపాకీలు..బాంబులన్ని వృథాయేగ..

మతమేమో అంటున్నది..కలతలలో నేనెందుకు..!?

పేదరికం కన్నగొప్ప..గురువేదోయ్ .

పరువేమో అంటున్నది..మంటలలో నేనెందుకు..!?