నా ప్రాణ బంధమా

నువ్వొక్కడివే పచ్చటి నేల తివాచిపై పడుకొని ఆకాశంవైపు చూస్తుంటే , ఆర్తిగా నా మనసంతా కరిగి ముత్యపు చినుకులా జారి నీ నుదుటిని ముద్దాడనా మనస్సులో బాధనో, మనిషితో బాధనో , వివర్ణమైన

నీ ముఖారవిందాన్ని , చల్లటి పిల్లతెమ్మరనై ప్రేమగా నిను చుంబించనా , నీ తనువంతా పరవశించే పరిమళాన్నై నిన్ను చుట్టేయనా

తొలి సంధ్యలో విడివడని నీ కమలాక్షువులను నునువెచ్చని అరుణ కిరణాన్నై తాకి , నిను సుతిమెత్తగా మేల్కొల్పనా

సముద్రపు అంచున నడిచే నీ పాదాలను అలనై అహల్యనై తాకనా, నీకై తరించిపోనా, నీతో బ్రతికేందుకై తపించిపోనా

ప్రశాంతంగా నువ్వున్న తరుణాన నీ మనస్సు తట్టే తలపుల ఘోషను ఆలకిస్తే, అనుక్షణం నలిగే నీకై , తపించే నా హృదయ లయల శబ్ధ తరంగమై

నీ మనస్సును చేరనా

కలనైనా నిను వదలలేని నా ప్రాణం , ప్రకృతితో కలిసి నీ చుట్టూనే పెనవేసుకొని ఉన్నా , ఒక్కసారి మనస్సులో ఐనా నను ప్రేమించానని చెప్పవేం

 నా ప్రాణం బంధమా నా ప్రేమ సాక్షిగా ఈ పంచభూతాల్లో

 ప్రశాంతంగా కలిసిపోనా..!!