మనసు తడి

పొట్లపాది మనస్తత్వం వాళ్ళది

ఎవ్వరితోనూ కలవరు

ఎవ్వరినీ కలవనివ్వరు

చూసీ చూడని నైజం

తనదాకా వస్తేనే ఉలికి పడతారు

అంటీ అంటనట్టు వుండి

చోద్యం చూస్తుంటారు

వింత పోకడలతో వినోదిస్తారు

చివరకు చేతులు కాలాక

చురకలతో ఎచ్చరిక మీదొస్తారు

అప్పుడు..నాది నేను అన్న నోరు

మనది మనమని భుజం తడతారు

ఊసరవెల్లి వేషంతో ఊదరగొడతారు

శకుని లా శకునాలు పలుకుతారు

నీతులను నాలుకకు అతికిస్తారు

పరకాయ ప్రవేశంలో దిట్ట వీళ్ళు

తడి గుడ్డతో గొంతులు కోసే రకం

తీరం చేరని పొడి పొడి

మాటలను నమ్మకండి

వివేకం విచక్షణలతో మనసుతడి

కలిగిన వాళ్ళను గుర్తించండి

బంధాల‌ విలువను పెంచండి