మధురమే

ప్రతి కణము మాట్లాడు..మౌనమే మధురమే..! 

చెలిచూపు రాగాల..సంద్రమే మధురమే..! 

భాషలకు అందనిది..మనసుపడు వేదనే.. 

కనలేని దృశ్యాల..కావ్యమే మధురమే..! 

ఏ మెఱుపు తీగతో..బంధమో ఊహలో.. 

మేఘాల తేఱులో..పయనమే మధురమే..! 

జీవితం గాలిలో..అద్దాల మేడలో.. 

ప్రేమతో ప్రేమలో..యుద్ధమే మధురమే..! 

ఊరించు అందాల..నగరియే నా సఖియ.. 

గజలైన సెలయేటి..తీర్థమే మధురమే..! 

ఉన్నదే లేనిదై..లేనిదే ఉన్నదోయ్.. 

భ్రమలన్ని తొలగించు..గగనమే మధురమే..!