మాతృ హృదయం
మాతృ హృదయం
గర్భ క్షేత్రంలో ప్రేమానురాగాల బీజం ప్రవేశించి
అపురూప రూపంతో విత్తు
పసి మొక్కగా ప్రాణం పోసుకుని
ప్రపంచానికి పరిచయం కాబోతున్న వేళ
పేగు పంచి ఊపిరిపోస్తూ
కన్న కలలు నిజం అయ్యే వేళ
ఆ హృదయం పరవళ్లు తొక్కే గంగమ్మ
అనురాగ అమృతాన్ని మూటకట్టి
కళ్ళలో ఒత్తులు వేసుకుని
తన ఆకలినిసైతం ఆదమరిచి
కన్న పేగుకు పంచిపెట్టే
ఆ త్యాగ శీల హృదయం అన్నపూర్ణ
బిడ్డ కాలిలో గుచ్చుకున్న ముళ్లు
తన గుండెల్లో దిగిన కత్తిలా తల్లడిల్లి
రెప్పలు దాటే దుఃఖపు చెలమలు
ఆ చెమ్మగిల్లిన హృదయం ఆనవాళ్లు
సంతు కళ్ళలో సంతోష కాంతులకోసం
ఘనమయ్యే వరకూ చమురుపంచే
వెలుగు దివ్వె తానై
ఆ పరితపించే హృదయం నిత్య తపస్విని