కలవల కన్మణి

అలంకరణే లేని

కొమ్మకు పూచిన పుత్తడివి 

చినుకు మెత్తగా వాలి

కునుకు తీసిన సొగసు నీది

పదగతులల్లిన 

పదహారణాలు ముత్యాలై

నవరస రత్నఖచితం నీవే కాబోలు 

సిరివెన్నెల చల్లని కాంతికి

పూసి మెరిసిన వాలు కనులే 

నీ కాటుకలద్దిన నయనాలు 

ప్రేమ పద మధురిమకు వాయనాలేమో 

ముగ్ధ సిరులొలికించు నీ

నవ్వే పెదవుల నాట్యం నూటొక్క

జిల్లాలకు ఊట బావులకు చేరు 

తీయని వంకల వ్యవహారమో!

సింధూరం చైత్రవీణై రాగం వినిపిస్తే 

చూసే కళ్ళకు కొత్త లోకానికి 

దారిని చూపి శివరంజనిలా గానామృత 

కచేరి చేసినట్టు అందం ఓ

అద్భుత సోయగాల సరాగం 

వెన్నెలకే వన్నెలద్ది పున్నమి నాటికి

వనాలన్నీ పూలై పూచి గాలికి 

గంధర్వ రాగాల మాలిక చేసెదవేమో.....!!