గుండె గాయమే

గుండె గాయమే చేసి గమ్యాన్నే మార్చేసి

మరువలేని మనసును మభ్యపెట్టుకుంటే

మారిపోయానని మంచీ చెడూ తెలిసెనని

తిరిగివచ్చి తలవాల్చి సేద తీర్చమనంటే

గడచిన గంటలు కొన్నైన తిరిగి వచ్చునా!!

మనసుకైన గాయపుమరక మాయమగునా?

ఆశలసౌధాలనే అణచి ఆశయాన్ని ముంచేసి

జీవితాశయమే లేకుండా జీవశ్ఛవమై బ్రతికుంటే

చెట్టువేర్లకే చెదలడితే నీరుపెట్టి చైతన్యమొచ్చెనని

చెలిమి అంటూ చెంతకుజేరి చేరదీయరాదా అంటే

నేలపై రాలిపోయిన ఆకులు చెట్టెక్కి చిగురించునా!!

చిరిగిన జీవితం క్రొత్తకాంతులతో చిందులు వేయునా?

సరైన అవగాహన కరువై సాహసమని సర్కస్ చేసి

బోర్లాపడి బొక్కలిరిగి బొడిపకట్టినాక బుద్దిమంతులంటే

తెలివి తెల్లారిపోయినాక తీర్పు చెప్పినట్లు ఉందనుకుని

శిక్ష అని గాలిలోన తాడుకట్టి ఉరితీసి ఉత్సవమనుకుంటే

జాగ్రత్తలే చెప్పి జీవించమన్నా, జరిగేది జరగక ఆగునా!!

కాలమే తీరిపోతే, జీవితం కడదేరక ముందుకి సాగునా?