గగనతలం
గగనతలం
అదొక అద్భుత విన్యాసాల చెట్టు
అక్కడ రేయి వెలుగుపూలు
వేలాడుతూ..
కోయలేనంత దూరాన
అరవిరిసి అలరిస్తాయి
ఆ చెట్టు అంతటికీ
ఒకే ఒక్క వెండి పండు
వెలుగు పూల మధ్య చల్లని వెలుగులతో
కనువిందు చేస్తుంది
ఆ పండు కావాలని పిల్లలందరూ
అమ్మ దగ్గర మారాం చేస్తారు
వాళ్ళను బుజ్జగించి జోకొట్టి
కనుల కిటికీలు మూసేసరికి
చెట్టు మీద కోటి వెలుగుల పువ్వు పూసి
రేయి పువ్వులను పక్కకు నెట్టేసి
తన అజమాయిషీ బాణాలను
పుడమి అంతా సంధించేస్తుంది
ఆ చెట్టుకున్న ఇంకో గొప్ప లక్షణం
తానుగా పంచే గాలులు..
అవి ఎంతటి బలమైనవైనా..
జీవకోటి మొత్తం వాటి ధాటికి వణికినా..
తాను మాత్రం ఇసుమంత కూడా కదలదు!
ఆ చెట్టు చేసే అపర విన్యాసాలు
లిక్కించ సాధ్యమా?!
అందుకే అంటాను
అదొక అద్భుతమైన చెట్టు అని!!