ఎవ్వరివి

కాలిమువ్వల సడిని చెవులలో వొలికించు చరణాలు ఎవ్వరివి 

మేలుకొలిపే వేళ రెప్పలను చుంబించు అధరాలు ఎవ్వరివి

కన్యకలు కనబడే స్వప్నాలు చూడడం తప్పు అనుకుంటాను   

మోమాటపడుతున్న చూపులను కవ్వించు పరువాలు ఎవ్వరివి

 

రోజాల తోటలను వేలాది పెంచడం కష్టమనుకున్నాను 

తలవంచి నేలపై బిడియాలు నాటించు నయనాలు ఎవ్వరివి

దేవశిల్పికి లేని నేర్పుతో తనువులో నిర్మించుకున్నాది  

అప్సరలలో లేని అందాలు నివసించు నిలయాలు ఎవ్వరివి

మొసలికన్నీటితో నిండిపోయిన కనుల చిత్రాలు ఉంటాయి 

శాంతపరిచేవరకు నీళ్లలో నిప్పులను పుట్టించు కలహాలు ఎవ్వరివి

మన్మథుని దగ్గరే విలువిద్యలో సులువు తెలుసుకొని గెలిచింది 

పూలబాణములేసి విరహాన్ని వోడించు కదనాలు ఎవ్వరివి 

తారకలు లేనపుడు చాయలకు రాకూడదంటుంది 'నెలరాజ'  

రాత్రులకు శృంగారలోకాన్ని చూపించు సరసాలు ఎవ్వరివి