ఎంతెంత దూరం
ఎంతెంత దూరం
అదిగో తను మొదటిసారి నిలబడింది
అయ్యో పడిపోతుంది పట్టుకోండి
అతడిలో ఆదుర్దా
అదిగో తను మొదటిసారి అమ్మ అంది
అవునా నాన్నా అని అనలేదా
అతనిలో సహజమైన ఆత్రుత
అదిగో తను మొదటిసారి అన్నం తింటోంది
అవునా
అతనిలో ఆశ్చర్యం
అదిగో తను మొదటిసారి పాట పాడింది
ఏ పాట
పిల్లలు పాడే ఆరున్నొక్క రాగంలో
అదే ఏడుపు చూసి
అతని కళ్ళల్లో నీళ్ళు
అదిగో తను మొదటిసారి ఎబిసిడి వ్రాసింది
అవునా
అతడి కళ్ళలో ఏదో గర్వం
అదిగో తను మొదటిసారి స్కూలుకు వెళుతోంది
అవునా
అతడిలో పెరిగిన బాధ్యత
అమ్మా !
నాన్న ఎంత దూరంలో ఉన్నాడు?
అదే ప్రశ్న
ఒక్క వీడియో కాల్ అంత దూరం
అంతే దూరం
అదే సమాధానం
ఎంతెంత దూరం అంటే
సెలవు పెట్టలేని దూరం
అది మధ్యతరగతి ఉద్యోగి జీవితంలోని భారం
అని ఆ తండ్రి చెప్పలేడు పాపం.