చెప్పలేను

తప్పులెన్ని చేశానో..నీకుతప్ప చెప్పలేను..! 
నీరూపం లోకానికి..ఇదేనంటు చూపలేను..! 

అందరిలో అన్నిటిలో..నినుచూసే తీరేదో.. 
వివరించే తపనతోటి..వ్రాయకనే ఉండలేను..! 

పిచ్చివాళ్ళ స్వర్గంలో..నరకమెలా ఉండగలదు.. 
నా వెర్రికి తగినమందు..ఇమ్మంటూ అడగలేను..! 

ఒప్పేదో తెలుసుకునే..దారిలోనె జన్మలెన్నొ.. 
పుట్టాలను కోరికనిక..ఏమాత్రం మోయలేను..! 

అందమైన మాయతోటి..అనుబంధం ఈ గంధం.. 
ఎఱుకగాను మిగలుతీరు..మాటలలో పెట్టలేను..! 

ఏ కోకిల రాగంలో..ఒదగనిదే విరహమధువు.. 
పనిగట్టుకు వడ్డించే..ముచ్చటలో మునగలేను..!