ஒருத்தி வருவாள்

ஒருத்தி வருவாள்;

கேட்காமலே இதயக்கூட்டினுள் இடம் புகுவாள்;

உறவுமுறைக்குள் எல்லாம் அடைபடமாட்டாள்;

அழும்போது சிரிக்க வைப்பாள்; 

சிரிக்கும்போது சிலாகிக்க வைப்பாள்.

"நான் சொல்றத கேளு முதல்ல!"என அடம்பிடிப்பாள் ; 

"நீ எல்லாரு மாதிரி இல்லடா நீ எப்பவுமே ஸ்பெஷல்தான்டா தங்கோ"  என உனை கொஞ்சுவதையே பொழுதுபோக்கும் தொழிலாய் கொள்வாள்.

"நான் இருக்கேன்ல; என்ட்ட சொல்லு! "

"சொல்லிப்புலம்ப நீயாவது இருக்கயே!"

"அந்த ரேணுகா இருக்கால்ல டென்சன் பண்ணிட்டா இன்னைக்கு!" "உங்கிட்ட பேசிட்டே புளி போட மறந்துட்டேன் டா"

"இன்னைக்கு பக்கத்து வீட்டு கோழி கூட விளையாடிட்டு இருந்தேன்! "

என துளியும் தொடர்பில்லா விஷயங்களை ஒத்த அலைவரிசை உடையவனாய் எண்ணி உன்னிடம் சொல்லி தன்னிடம் தானே அழகியல் மொழி பேசுவாள்.

வாழ்க்கை ஏதேனுமொரு இடத்தில் இத்தகுபெண்ணை அனைவருக்கும் அடையாளங்காட்ட கடமைப்பட்டிருக்கும் ; 

நீந்தத் தெரியாமல் தத்தளித்துக்கொண்டிருக்கும் ஒருவனுக்கு உயிர்பிழைக்க படைத்தவனால் கடைசியாய் அனுப்பப்பட்ட மரத்துண்டு அவள்.

இறுகப் பற்றிக்கொள்ளுங்கள்!  

அவள் தேவதைகளின் தேவதை!