பேசும் கிளி

ஒரு கிளி 

பேசும் கிளியாவதுதான்

அதன் வாழ்வின் பெரும் துயரம்

பேசும் கிளிகள்

பேசிக்கொண்டேயிருக்கவேண்டும்

ஒரு நாள் அது பேசத் தவறினாலும்

அதை யாரும்

கிளி என்று ஒத்துக்கொள்ள மாட்டார்கள்

கிளிக்கென இயற்கையில்

ஆயிரம் சிறப்புகள் உண்டு

கிளி நேர்த்தியாகப் பறக்கும்

கிளியின் குரல் கிளர்ச்சியூட்டுது

கிளியின் நிறம் வசீகரமானது

கிளி தன் அலகினால்

பழங்களை கொறிப்பதை

நாளெல்லாம் பார்க்கலாம்

ஆனால்

ஒரு கிளி பேசக்கற்றுக்கொண்டால்

இவை அனைத்தும் மறந்துபோகும்

பேசுவது ஒன்றே கிளியின் இயல்பு என 

பேசும் கிளிகள் நம்பவைக்கப்படுகிறன

கிளிக்கும் என்றாவது ஒருநாள்

தொண்டை கட்டிக்கொள்ளும்

எதையோ நினைந்து மனமுடைந்து

கிளிக்கு வழக்கமாகப் பேசும் வார்த்தைகள்

மறந்து போகும்

தன் சிறகுகளில் ஒன்று

வெட்டப்பட்ட வருத்தத்தில்

இனி யாரிடமும் ஒரு வார்த்தை பேச

வேண்டாமென

வீம்பாக இருந்துவிடும்

இந்த உலகம் அதை ஏற்காது

ஒரு போதும் அதை மன்னிக்காது

பேசும் கிளிகள் 

பேச முடியாமல் தடுமாறுவது

அவை பறக்க முடியாமல் போவதைவிட

அவலமானது

நானும் ஒரு பேசும் கிளியான பிறகு

மனம் கலங்கி என் சொற்கள்

உறையும் பொழுதுகளில்

எனக்கு எந்தத் தோளில் அமர்வது

என்று தெரியவில்லை