ସ୍ୱାମୀ ବିବେକାନନ୍ଦ
ସ୍ୱାମୀ ବିବେକାନନ୍ଦ
ବଙ୍ଗଦେଶେ ଅଠରଶ ତେଷଠି ଜାନୁଆରୀ ବାର ଦିନ
ନରେନ୍ଦ୍ର ନାଥ କଲେ ବିଶ୍ୱନାଥ ଦତ୍ତଙ୍କ କୋଳ ମଣ୍ଡନ ।
ଏକବିଂଶ ବର୍ଷେ ହେଲେ ପିତୃହୀନ ଦାରିଦ୍ର୍ୟର ପ୍ରପୀଡିତ
ଉଚ୍ଚ ମନା ସିନା ଦୁର୍ଦିନରେ ହୁଏ ପୂର୍ଣ୍ଣରୂପେ ପ୍ରସ୍ଫୁଟିତ ।
ଦକ୍ଷିଣେଶ୍ୱରର ପୁଣ୍ୟାତ୍ମା ଗୁରୁ ରାମକୃଷ୍ନ ପରମହଂସ
ପଟ୍ଟଶିଷ୍ୟ ତାଙ୍କ ରକ୍ତ କଫ ପିଇ ପ୍ରମାଣ ଦେଲ ହେ ଶୀର୍ଷ ।
ଅନୁସନ୍ଧିତ୍ସା ଚରମ ଯାହାର ଆଧ୍ୟାତ୍ମିକତାର ପଥେ
ସଦଗୁରୁ ବିନା କିଏ ବା କରନ୍ତା ପ୍ରବେଶି ହୃଦୟ ରଥେ ।
ଅଠରଶ ତେୟାନବେରେ ଚିକାଗୋ ଧର୍ମସଭା ଆୟୋଜନ
ମଣିକାଂଚନ ସଂଯୋଗେ କରିଲ ଧରମର ବ୍ୟାଖ୍ୟାନ ।
ହେ ମୋର ପ୍ରିୟ ଆମେରିକା ଭାଇ ଭଉଣୀ- ଉଦାତ୍ତ ବାଣୀ
ପ୍ରତିନିଧିତ୍ୱ କରି ହିନ୍ଦୁତ୍ୱର ଜଗତ ଆଗେ ବଖାଣି ।
ସତ୍ୟ ଉପରେ ଆଧାରିତ ଏହା ହିଂସାର ସ୍ଥାନ ନାହିଁ
ଦୟା କ୍ଷମା ଶାନ୍ତି ମୈତ୍ରୀ ସହାନୁଭୂତିର ବାରତା ଦେଇ ।
'ପ୍ରାଚ୍ୟ ଓ ପାଶ୍ଚାତ୍ୟ' 'ପରିବ୍ରାଜକ' ଯେ 'ବର୍ତ୍ତମାନର ଭାରତ'
'ବେଦାନ୍ତ'ର ବାଣୀ ଦୀକ୍ଷାନ୍ତ ଭାଷଣ ଭ୍ରମିଲ ସାରା ଭାରତ ।
କନ୍ୟା କୁମାରୀର ସାଗର ମଧ୍ୟରେ ତପସ୍ୟା କରିଲ ଯାଇ
ଯୁବ ଗୋଷ୍ଠୀରେ ଉନ୍ମାଦନା ଭରି ଭାରତ ଗଢିବା ପାଇଁ ।
ଉନବିଂଶ ଦୁଇ ଜୁଲାଇର ଚାରି ହେଲ ବିଭୁ ପାଦେ ଲୀନ
'ଯୁବା ଦିବସ'ରେ ସ୍ମରଣ କରୁଛୁ ବିବେକାନନ୍ଦ ମହାନ ।
-ବିଶ୍ୱେଶ୍ଵର ମାଝୀ-