ମାଆ ହାତଖିଆ ପରମ ତୃପ୍ତି

ଲକ୍ଷ୍ମୀ ଯାଇଛନ୍ତି ବରୁଣ ପୁର l

   ପଉଷ ମାସରେ ବାପର ଘର ll

ଶ୍ରୀକ୍ଷେତ୍ରରେ ଆଉ ଜଳୁନି ଚୁଲି l

   କାଳିଆର ରଙ୍ଗ ଯାଇଛି ଛାଡ଼ି ll

କେମିତି ପୁରିବ କାଳିଆ ପେଟ l

  ନିତି ଖାଏ ଯେ ଷାଠିଏ ପଉଟ ll

ମାଆ ଯଶୋମତି ଶୁଣିଲେ କଥା l

 ମନରେ ହୋଇଲା ଦାରୁଣ ବ୍ୟଥା ll

ଆସି ପହଞ୍ଚିଲେ ଶ୍ରୀକ୍ଷେତ୍ରେ ପୁଣି l

  ହସ୍ତେ ଭୁଞ୍ଜାଇବେ ସର ଲବଣୀ ll

ଦ୍ୱାପରର ଲୀଳା ସ୍ମରିଲେ ପ୍ରଭୁ l

  ସ୍ନେହମୟୀ ମୋ ଜନନୀ ଆସିବୁ ll

କୋଳେ ଧରି ମୋତେ ଦେବୁ ଖୁଆଇ l

 କେତେ ନାନାବାୟା ଗୀତକୁ ଗାଇ ll

ଶ୍ରୀକ୍ଷେତ୍ରେ ଚାଲିଛି ଅପୂର୍ବ ଲୀଳା l

  ଦାରୁଦେବତାର ଶୈଶବ ଖେଳା ll

ମାଆ ଯଶୋମତି ସକାଳୁ ଉଠି l

  କାଳିଆକୁ କୋଳେ ଧରି ଖୁଆନ୍ତି ll

ମାଆ ହାତ ଖିଆ ପରମ ତୃପ୍ତି l

 ଯୁଗେଯୁଗେ ମାଆ ମୋ ଯଶୋମତି ll

ବାପ ଘରେ ଲକ୍ଷ୍ମୀ ଯାଆ ତୁ ରହି l

  ନିତି ମାଆ ମୋତେ ଦିଅନ୍ତୁ ଖୋଇ l

 ଯୁଗ ଯୁଗ ପାଇଁ ରହୁ ଏ କଥା ll

ବାତ୍ସଲ୍ୟମୟୀ ମୋ ଯଶୋଦା ମାତା ll