डिजिटल
डिजिटल
सायब आलं शाळंमंदी
म्हणलं-" शेल्फी घ्यायची
बाई पोरांची,
क्यामेरा हाय का?
म्हणले,
"कायपण काय सायब,
बिना मोबाईलचं पोरगं न
बिना क्यामेऱ्याचा मोबायल कधी आसतो काय?
आता सारं त डिजिटल झालं बगा
मोबायल,कॅमेरा,टेक्नोलाजी,
घर, खेडी, गाव, शहर, राज्य, देश, विश्व
सारं डिजिटल !
येवढंच काय ,
माणूस... मेंदू..मन...मनाचे आतले न भायेर चे व्यवहार.
नाती..रीतीभाती...सगे सोयरे..
पोरं ..न पोरांचे विचार
सारे ssss डिजिटल!
जलम..जगणं- मरणं
हसणं.. बोलणं..लिव्हणं
वाचणं... नी वाचणं
सारं डिजिटल.
पण सायबजी,
माफी मांगते...जरा बोलते,
नेमकं डिजिटल म्हंजी
काय हो ?
सापडल का यात कुठं
माणूस माणसाला
माणसासाठी माणुसकी
जपणारा दावणारा!
हाय का कुठं 'गुरुजी'
आन गुरुजी दिसताच
आदबीनं हुभा
र्होणारा इद्यार्थी
बघा बरं ह्या
'डिजिटल '
जगात?