ಮುಂಗಾರು ಮಳೆ

ಒಮ್ಮೆ ಮೋಡ ಒಮ್ಮೆ ಬಿಸಿಲು

ನಡುವೆ ಮಿಂಚು ಗುಡುಗು ಸಿಡಿಲು

ನೆಳಲು ಬಿಸಿಲುಗಳ ಜೂಟಾಟ

ನಭದಿ ಕಾರ್ಮೋಡಗಳ ಚೆಲ್ಲಾಟ

ನಡುವೆ ತುಂತುರು ಹನಿಗಳು

ಮುಂಗಾರು ಮಳೆ ಹನಿಗಳು

ಮುಂಗಾರು ವರ್ಷದ ಹರ್ಷ

ಭುವಿಗಾಯಿತು ಭಾವೋತ್ಕರ್ಷ

ತುಂತುರು ಹನಿಗಳ ಸಿಂಚನ

ಇಳೆಗಾಯಿತು ರೋಮಾಂಚನ

ರಂಗೇರಿತು ರೈತಮಕ್ಕಳ ಅಂಗಳ

ಭುವಿಗಾಯಿತು ಗರ್ಭಾಂಕುರ

ಇಳೆಯ ತೋಯಿಸಿತು ಮಳೆ

ಮುನ್ನಿನ ಮುಂಗಾರು ಮಳೆ

ಮುಂಗಾರು ಮಳೆಯಾಟ

ನಗರವಾಸಿ ಗಳ ಪರದಾಟ

ಬಿರುಗಾಳಿ ಯೊಡನೆ ಮಳೆ

ಧರೆಗುರುಳುವ ಮರಗಳು

ಹಾರಾಡುವ ಬಡವರ ಸೂರುಗಳು

ಕೇಳುವವರಾರು ಅವರ ಗೋಳು?

ಸಂಜೆ ಮಳೆಯ ಭೋರ್ಗರೆತ

ತಂದಿತು ಸಂಚಾರಕೆ ಸ್ಥಗಿತ

ನೀರು ತುಂಬಿದ ರಸ್ತೆಗಳು

ಕಿಕ್ಕಿರಿದು ನಿಂತಿಹ ವಾಹನಗಳು

ವಾಹನ ಸವಾರರ ಆತಂಕ ಇಂತು

ಮಳೆಯಲಿ ಮನೆ ಸೇರುವುದೆಂತೋ?