હોળી

આપણે

ક્યારેય

રોમાંટિક હતા ખરા?

સંજોગોની સાથે સતત

સંઘર્ષ કરતાં રહ્યા તમે...

કારકિર્દીને જતનથી

ઘડતાં રહ્યા તમે

બુદ્ધિને કસી કસીને ,

       મેચ્યોર બનતાં રહ્યાં અમે,

ને બર્નાર્ડ શૉ વાંચી-વખાણીને

વેવલાઈ પર હસતાં રહ્યા અમે...

આપણે

સમય કે સ્વભાવથી મજબૂર

       પ્રેમલા-પ્રેમલીની વાત કરી હશે

ક્યારેય.?

ના, ના, આજે, કાલે નહીં

જમાના પહેલાં પણ?

ના...

(તોતેર મણની ના)

આજે જ્યારે બારી બહાર નીરખી રહી છું,

       અબીલ-ગુલાલ અને ક્યાંક રંગથી

હોળી રમતાં

       એક-બીજાને પકડવા દાવ અજમાવતાં,

ગુસ્સાની ચિચિયારી પાડીને હસી પડતાં,

       અસ્તિત્વને લાલચોળ બનાવી મુકતા,

રંગે રંગાયેલ અને નેહે રસાયેલ એ લોકોને

તીરે ઊભા રહી નીરખી રહી છું ત્યારે

એ રસ-રંગની ભાગીદાર બની રહી છું ત્યારે

એવું કેમ લાગે છે કે

       મારી પાસે, મારી સાથે કેમ કોઈ નથી?

આખી દુનિયામાં શું હું એક જ પ્રેષિત ભર્તૃકા છું?

       આટલા કોલાહલ વચ્ચે કેમ ઊભી છું-

સાવ એકલી-અટૂલી?