ઘાત ના કર
ઘાત ના કર
આમ રોજે રોજ આવી તું નકામા ઘાત ના કર,
હાજરી તારી અહીં ક્યાં છે તું એવા ઘાત ના કર,
આંખમાં પાણી હતાં ને તું મનોમન યાદ આવી,
આહ મારી સાંભળીને તું અઘીરા ઘાત ના કર,
સાંજ રમણી નાર પેઠે આજ પાછી યાદ આવી,
સ્મિત મધુરું હોઠ પર લાવી મધૂરા ઘાત ના કર,
ટેરવાં સૂના થયાં સ્પર્શી નથી સંવેદનાઓ,
સ્પંદનોને રાખ મૂઠ્ઠીમાં ને પાછા ઘાત ના કર,
સ્નેહની બાધા હતી તો, તે વધારી પૂરી કરને,
દિલ અહીં બેકાબુ બનશે, આજ નોખા ઘાત ના કર.