ଅର୍ଚ୍ଚନାର ତାଲା ବନ୍ଦ ଡାଏରୀ-୨୯

ଏଇ ତାଲା ବନ୍ଦ ସମୟରେ ବହୁତ ଫୋନ କଲ ଆସୁଛି । କିଏ କଣ କହୁଛି ଜାଣିହେଉନି । କେହି କେହି ଗାଳି ବି ଦେଉଛନ୍ତି । ଆଉ କେହି ମଜା କରୁଛନ୍ତି । ଆଉ କେହି ଫୋନ କରି ହଇରାଣ କରୁଛନ୍ତି । 

  କିନ୍ତୁ ଆଜି ମୋ ସହ ଗୋଟେ ଭଲ ଲୋକ ଜଣେ କଥା ହେଲେ । 

- ହେଲୋ ମାଡାମ କେମିତି ଅଛନ୍ତି ?

-ମୁଁ ଭଲ ଅଛି .....କିନ୍ତୁ ଆପଣ କିଏ ମୁଁ ଜାଣିପାରିଲି ନାହିଁ ..

- ମୁଁ .... ମୁଁ ହେଉଛି ଗୋଟିଏ ଅଭାଗା ......

- ଆପଣ କିଏ ? ଆଉ ଏମିତି କାହିଁକି କହୁଛନ୍ତି ଯେ .......

- ହଁ ମାଡାମ । ମୁଁ ସତ କହୁଛି .....

- ଫୋନ ରଖୁଛି ....

- ସେଦିନ ତୁମକୁ ମୁଁ ଅସୁନ୍ଦରୀ କହି ଫେରେଇ ଦେଇଥିଲି । ହେଲେ ମୁଁ ଜାଣି ନଥିଲି ଯେ ମୁଁ ତୁମ ପ୍ରେମରେ ପଡିଯାଇ ଥିଲି ବୋଲି ।

- ତମେ କିଏ ? ମୁଁ ତ ଜାଣିନି......

- ମୁଁ ବିବେକ........

- ଓଃ.... ଆରେ ମୋ ଦିଦି କେମିତି ଅଛି ?

- ହଁ ଭଲ ଅଛନ୍ତି ସେ ......। 

- ଆଉ ତମେ କ'ଣ କରୁଛ ?

- ମୁଁ ଡାକ୍ତରଖାନାରେ ଅଛି । 

- ତମେ ସେଠି କ'ଣ କରୁଛ ?

- କମ୍ପାଉଣ୍ଡର ଅଛି ।

- ଓଃ..... ଆଜି ହଠାତ ମୋ ପାଖକୁ କଲ କରିଛ ଯେ .....

- ଏ କରୋନାରେ କେତେବେଳେ କ'ଣ ହେବ ମୋର ଜଣା ନାହିଁ ...। ତେଣୁ ଟିକେ ଫୋନ କରି ଦେଇ ତୁମ ସହ ଥରଟେ କଥା ହେବି ବୋଲି ଭାବିନେଲି ।  

- ହେଲେ ତମେ .......

- ହଁ ମୁଁ ତୁମ ଉପରେ ସବୁବେଳେ ଚିଡେ । ହେଲେ ସେଇ ଚିଡିବା ଭିତରେ ମୁଁ ତୁମକୁ ଭଲପାଏ......

- ସତରେ ନା କ'ଣ ? ମୋ ସହିତ ମଜା କରୁନ ତ ?

- ନା ବାବା ନା ......। ମୁଁ ତମ ସହ ମଜା କରୁନି । ତୁମକୁ ବହୁତ ଭଲ ପାଏ ।

- ଦିଦି ଜାଣିଲେ ମାରି ପକେଇବ ......

- ତମେ କାହାକୁ କହିବନି ଏ କଥା ......କିନ୍ତୁ ମୁଁ ତୁମକୁ ...

- ହେଲେ ତମେ ତ ସେଦିନ କହୁଥିଲ ଯେ ତୁମେ ମତେ ଘୃଣା କର ବୋଲି । ଆଉ ମୋ ମୁହଁ ଦେଖିଲେ ତମକୁ ଚିଡ଼ି  ଲାଗେ ବୋଲି । ସେଇଥି ପାଇଁ ତ ମୁଁ ଦିଦିକୁ ଦେଖିବାକୁ ତମ ଘରକୁ ଯାଏନି । 

- ତମକୁ ମୁଁ କେମିତି ବୁଝେଇବି ଯେ, ତମ ମୁହଁକୁ ଦେଖିଲେ ମୁଁ ଆଉ କିଛି କାମ କରିପାରେନି । ଚାରିଆଡେ ଖାଲି ତମ ମୁହଁ ଦେଖା ଯାଏ ବୋଲି ....।

- ସମୁ.......! ତମେ ଆଗରୁ କହିଲନି ଯେ ....।

- ନା ମୁଁ ଏବେ ବି ତମକୁ ପାଇବାକୁ ଚାହେଁନି । ତମେ ଆଉ କାହା ସହ ଖୁସି ରେ ରୁହ......

- କରୋନା ର ଚକ୍ରବିହ୍ୱ ଭିତରେ ଆଜି ମୁଁ ରହିଛି । କେତେବେଳେ କୋଉ......

- ନା ନା ତମେ ସେମିତି କୁହନି ......। ତମେ ସୁରକ୍ଷିତ

 ରୁହ ସବୁଦିନ......

- ଏଇ ଶୁଣ .....! ରହୁଛି.....

ସେପଟୁ ପାଟି ଶୁଣା ଯାଉଥିଲା । ସମୁ ! ଅମ୍ଳଜାନ ଥଳି ଆଣ...... ।

 ମୁଁ ତାଜୁବ ହେଇ ଫୋନ ଧରି ଠିଆ ହେଇଥିଲି ସେମିତି...

ଝରକା ପଟେ ଦେଖୁଥିଲି ମୁଁ, ପଶ୍ଚିମ ଆକାଶରେ ସୂରୁଜ ଦେବତା ତାଙ୍କ ନାଲି କିରଣକୁ ବିଛେଇ ଦେଇ କୋଉ ଏକ ଅଜଣା ରାଇଜକୁ ଲମ୍ଫ ଦେଉଥିବାର ଦୃଶ୍ୟକୁ....