ୟାସ୍
ୟାସ୍
ଘୁମୁରି ବସିଛି ପରିବେଶ ରାଣୀ
ଶୁଭେନି କୋଳାହଳ,
ଘନେଇ ଆସୁଛି ପ୍ରଳୟ ସମୟ
ୟାସ୍ କରିବ ଖେଳ ।
ଝରିବ ବରଷା ଦିଶିବ ଚପଳା
କମ୍ପିବ ମହୀ ତଳ,
ଅଶାନ୍ତ ସମୁଦ୍ର ଉତ୍ତାଳ ତରଙ୍ଗେ
ଲଙ୍ଘିବ ନିଜ କୂଳ ।
ରାସ୍ତା ଘାଟ ଠାରୁ ବିଲ ବାଡ଼ି ଯାଏ
ହୋଇବେ ଜଳ ଜଳ,
ସର୍ବତ୍ର ଜଳିବ ବିନାଶର ବହ୍ନି
ବିଷମ ହେବ କାଳ ।
ବହିବ ବତାସ ଉଡିବ ଛପର
ଭାଙ୍ଗିବ ବୃକ୍ଷ ଡାଳ,
ଧରାଶାୟୀ ହେବ ମାଟିର କୁଟୀର
ନର ହେବ ନିର୍ବଳ ।
ରୌଦ୍ର ରୂପ ନେଇ ଆସୁଛି ସେ ମାଡ଼ି
ହାତେ ଧରି ତ୍ରିଶୂଳ,
ଭୟ ଆତଙ୍କରେ ଲୁଚିଛି ମଣିଷ
ପାଉନି ଥଳକୂଳ ।
ରୋକି ପାରୁ ନାହିଁ ଆଧୁନିକ ଜ୍ଞାନ
ବିଫଳ ଯନ୍ତ୍ର କଳ,
ପ୍ରକୃତି ଆଗରେ ନଇଁ ଯାଉ ଆଜି
ଘର ଛାଡ ଚଞ୍ଚଳ ।