ଯେବେ ବର୍ଷା ଆସେ ଆମ ଓଡିଶାକୁ

ଲାଗିଲା ଆକାଶେ ବାଦଲର ମେଳା

ଝଟକିଲା କଳା ମେଘେ ବିଜୁଳି

ଛମ ଛମ ହୋଇ ବରଷେ ଶ୍ରାବଣ

ଖାଲଖମା ଗଲା ଜଳେ ଉଛୁଳି ।

ଶୁଭେ ରହି ରହି ଶବ୍ଦ ଘଡଘଡି

ଲାଗି ଲାଗି ରହେ ବରଷା ଝଡି

ନଦୀ ନାଳ ଯାଏ ବର୍ଷା ଜଳେ ଭରି

ମାଡି ଆସେ କୂଳେ ପ୍ରବଳ ବଢି ।

ବନ୍ଯାରେ ହୁଅଇ ବହୁ କ୍ଷୟକ୍ଷତି

କ୍ଷେତର ଫସଲ ଜୀବନ ହାନୀ

ଭାଙ୍ଗେ ଘରଦ୍ବାର ବ୍ଯାପେ ମହାମାରୀ

ସୃଷ୍ଟି ନାଶ କରେ ବହୁଳ ପାଣି ।

ଯେବେ ବର୍ଷା ଆସେ ଆମ ଓଡିଶାକୁ

ବିପଦ ସତେ କି ଆସଇ ମାଡି

ନଦୀକୂଳ ସ୍ଥିତ ଗ୍ରାମ ଓ ସହରେ

ଲୋକେ ଆତଙ୍କିତ ହୁଅନ୍ତି ଭାରି ।

ହୋଇଲେ ନଦୀରେ ବନ୍ଧ ଆନିକଟ

ବହୁମୁଖୀ ନଦୀବନ୍ଧ ପ୍ରକଳ୍ପ 

ଜଳ ବିଦ୍ୟୁତର ଉତ୍ପାଦନ ସହ

ଜଳଯୋଗେ ଜମି ହେବ ସେଚିତ ।

ଜଳଭଣ୍ଡାରରେ ହୁଅଇ ସଞ୍ଚିତ

ମଧୁର ବିଶୁଦ୍ଧ ଜଳ ପାନୀୟ

ଯୋଗାଣ ହୁଅଇ ନଳ ସାହାଯ୍ଯରେ

ରହେନାହିଁ ଜଳକଷ୍ଟର ଭୟ ।

ହୋଇ ବିଭାଜିତ ଶାଖା ଉପଶାଖା

ବହି ଯାଉଛନ୍ତି ଅନେକ ନଦୀ

ବନ୍ଯାର ପ୍ରକୋପ ହେବ ପ୍ରଶମିତ

ବହୁମୁଖୀ ବନ୍ଧ ନଦୀରେ ବାନ୍ଧି ।

ଉପଯୋଗ କଲେ ଜଳ ସମ୍ବଳକୁ

ବିକଶିବ ନୂଆ ଆଲୋକ ଆଶା

କୃଷି ଯୋଗାଯୋଗ ବାଣିଜ୍ଯ ଶିଳ୍ପରେ

ସମୃଦ୍ଧ ହୋଇବ ଆମ ଓଡିଶା ।