ତୋପାଇଁ ହେଲି ମୁଁ କବି

ତନୁ ତୋ ବାସୁଛି ଚନ୍ଦନ ଚନ୍ଦନ

ଆଖି ତୋ ଦିଶୁଛି ଭାରି

ମନ ତଳେ ତୋର ମଳୟ ବହୁଛି

ଓଠେ ରଙ୍ଗ ପିଚିକାରି I

ଫୁଲ ତାଙ୍କଦେହେ ତୋ ନାମକୁ ଲେଖି

ଖୁସି ହେଉଛନ୍ତି ମନେ

ଅଭ୍ୟାସ କରୁଛି କୋଇଲି ତୋପାଇଁ

ଗୀତଟେ ଗାଇବ ଦିନେ I

ତାରାମାନେ ସବୁ ମାଳା ଗୁନ୍ଥୁଛନ୍ତି

ମଣ୍ଡିବେ ଲୋ ତୋର ଗଳା

ମଧୁ ସାଇତୁଛି ମଧୁପ ତୋପାଇଁ 

ତିଆରିବ ମଧୁଶାଳା I

ତୋ କଣ୍ଠରୁ ଶୁଣି ପ୍ରୀତିର ଗଜଲ

ରାତି ଦେଖିଲାଣି ସ୍ୱପ୍ନ

ତୋ ମୁହଁରେ ଦେଖି ହସର ଲହଡି

ହସୁଛି ପୂନେଇଁ ଜହ୍ନ I

କେତେଯେ ସପନ ତୋପାଇଁ ଲୋ ସଖୀ

ହୃଦୟେ କରିଛି ଘର

ତୋ ଗଭୀର ପ୍ରେମ ଅତଳ ସାଗର

ଚହଲାଏ ମନ ମୋର I

ରଙ୍ଗ ତୂଳୀ ଧରି ବସିଗଲି ଦିନେ

ଆଙ୍କିବାକୁ ତୋର ଛବି

ସେହି ଛବିଗୋଟି କବିତା ପାଲଟି

ସଜାଇଲା ମୋତେ କବି I