କଳଙ୍କିନୀ
କଳଙ୍କିନୀ
କଳଙ୍କିତ ଆଜି ଇତିହାସ ମୋର
କଳା କାହ୍ନୁ ତୁମ ପାଇଁ
ଅପବାଦ ଟୀକା କପାଳେ ପିନ୍ଧିଚି
କଳଙ୍କିନୀ ପଦ ପାଇ ।
ପର ପୁରୁଷରେ ଭାବ ଯୋଡ଼ିଦେଇ
ଭୁଲିଗଲି କୂଳ ନୀତି
ବଂଶୀର ମୋହରେ ହେଇଗଲି ମୋହ
ବାଇ କଲା ତୁମ ପ୍ରୀତି ।
ହୃଦୟର ଭାଷା ହୃଦୟକୁ ଜଣା
ଆଖି କଥା ବୁଝେ ଆଖି
ଯନ୍ତ୍ରଣା ଯାତନା ବିରହ ବେଦନା
ସହେ ଅୟୁତ ବୈଶାଖୀ ।
ଦୁନିଆ କି ବୁଝେ ହୃଦୟର ବ୍ୟଥା
କାହା ପାଇଁ କିଏ ଝୁରେ
ପ୍ରଣୟ ଜୁଇରେ କିଏ ଯାଏ ଜଳି
ଭିଜେ ଅସରା ଲୁହରେ ।
ତୁମ କଳା ରଙ୍ଗ ସାଜିଲେ କଳଙ୍କ
ଦୁଃଖ ନାହିଁ ମନେ ମୋର
ପୁଜାରିଣୀ ସାଜି କରୁଥିବି ପୂଜା
ରଖି ଜନ୍ମ ଜନ୍ମାନ୍ତର।