ଆସ ମୋ ଜଗା ବଳିଆ
ଆସ ମୋ ଜଗା ବଳିଆ
ମାଣିକ ସାଜି ମୁଁ ଦହି ଆଣିଅଛି
ଆସ ମୋ ଜଗା ବଳିଆ,
ଅତି ଶରଧାରେ ଖୁଆଇ ଦେବିରେ
ଯଶୋଦା ରାଣୀ ଭଳିଆ ।
ଆଶା ଅଛି ମୋର ଏଇ ବାଟେ ତୁମେ
ନିଶ୍ଚୟ ଆସିବ ବୋଲି,
ତେଣୁ କରି ଘୋଡ଼ାଟାପୁ ଶବଦକୁ
କାନେଇ ରହିଛି ଖାଲି ।
କଳା ଧଳା ଦୁଇ ଘୋଡ଼ାରୁ ଓହ୍ଲାଇ
କହିବ ମୁରୁକି ହସି,
ଦହି ମୁନ୍ଦେ ଦିଅ ଶୋଷରେ ଆମର
ତଣ୍ଟି ଯାଉଅଛି ଶୁଖି ।
ପଣତରେ ମୋର ଝାଳ ପୋଛିଦେଇ
ବଡ଼ ସରାଗରେ ସତେ,
ତୁମ ଦୁହିଁଙ୍କୁ ମୁଁ ଖୁଆଇବି ଦହି
ଆନନ୍ଦରେ ନିଜ ହାତେ ।
କଉଡ଼ି ବାଵଦ ମାଗିବିନି କିଛି
ଚାହିଁ କଳା ଧଳା ମୁଖ,
ପାସୋରିବି ସବୁ ସଂସାର ଜଞ୍ଜାଳ
ଲଭିବି ବୈକୁଣ୍ଠ ସୁଖ ।